1Cor 16 | PMA | STEP | Tahos maselus usil asa koa mimutisi usil mane koa mimul milah ruaini vakataun meatin keil onen Ahi en out Serusalem. Kami mihoumoni hesuval koa naviteni min meatin keil en sios keil en provins ten out Kalesia.

a 16:1Umen 11:29; Rom 15:25-26; Kal 2:10

b 16:5Umen 19:21

c 16:8 Dut 16:9-11

d 16:9Umen 19:8-10

e 16:10 1 Kor 4:17

f 16:12Umen 18:24-28; 1 Kor 1:12; 3:5-6

g 16:15 1 Kor 1:16

h 16:19Umen 18:2

i 16:22Kal 1:8-9

1 Corinthians 16

Hihiseien keke Avasak Mese keke Avasan Kataunien Min Kristin Keil ten out Serusalem

1 Tahos maselus usil asa koa mimutisi usil mane koa mimul milah ruaini vakataun meatin keil onen Ahi en out Serusalem. ^a Kami mihoumoni hesuval koa naviteni min meatin keil en sios keil en provins ten out Kalesia. 2 En Sande en wik vasi keil, tetai en kami heling seh en tei mane housil asa koa kei votini en umen onen ka heling revi. Hesakini, navong nimai, miherlahtei mun mane enek. 3 Navong nimai, nitis leta keil ten ileaien ven koa keitel mirie lat keitel telvakur sanien onami vaha en out Serusalem. 4 Munak nilesi hetahos keke inau mun maha, keitel enek telhousil kat inau.

Pol Vit Usil Ualien Onen Vaha Vales Me-Korin Keil

5 Anatin keke nimai nisao en kami, ka helamu, nika vas provins ten out Masedonia. ^b 6 Vahesa nito hetal min kami ten avong havivis, vuo ten avati vahis ten an tisa. Hekatau eni, kami mikilea mivakataunau en sise onak en out kave maha ien. 7 Ekrovattei keke males kami vahi ten avong havivis. Munak Asuv hemaeni, ekvati mok mato vataveah vatal min kami. 8 Ka nito ekonek en taon ten out Efesas hetokol avong ten Pentekos ^c 9 veni nalesi keke Ahi sehen voiteh keke umen keil onak en out enek, heite teni mariso, avaseini keke vativieh keil onak avi houlu. ^d

10 Munak Timoti hemai ven kami, mihekur revi keke nandemkotei navong heto hetal min kami veni kei mul mum min Ahi Asuv suval inau etin. ^e 11 Sakini, meatin hetovuol helei seseini. Mihekatauni mok keke heha ris en ualien onen en tomat keke vales inau, veni namul narosini ral min tunali sav keil en demkatien.

12 Mivis nau usil tuer Apolos. ^f Nasak visi mahiteni mini keke hehat hesao en kami hetal min tei en tunali sav keil ten demkatien, ka kei enrovattei vahat emau en avong koanek. Navong kei heles ahho, hehat esuk ven kami.

Selusien Ekor

13 En usite ten demkatien onami, mihelei kokoe eni ka mihelomal hekeih. Rendemien onami hekeih ka minametautei. 14 Umen vasi onami, mihoumoni hetal min envatien.

15 Tuak ka ahinkuli keil, kami mikilea en Stefanas ^g ka onen keil koa akur demkatien mulamu en meatin savsav keil en provins onami ten out Akea. Keil asan vasi moulien one vakataun meatin keil onen Ahi. 16 Nasel kat kami keke mihesan kami keke mihehoum hetal min vati meatin keil amukonek ka meatin vasi keil emun koa amum keih ral min keil. 17 Nasi nau mok navong nales amaien onen Stefanas, Fotunatas, ka Akaekas koa aka ven kami, veni keitel telro ral minau en usite onami. 18 Keitel telvati lat rendemien onak, ka nakilea ihati lat rendemien onami emun. Sakini, mihehouhou en vati meatin keil koa amukonek.

19 Tuami keil en sios keil ekonek en provins ten out Asia aviten 'More' min kami. Akuila ka Prisila ^h emun ealuvati mok luvahiten 'More' min kami en isen Asuv, hetal min koakeil alah ruai en teim onealu. 20 Kristin vasi keil en out enek emun aviten 'More' min kami. Miheav kat kami en envatien onen Ahi.

21 Milesi, ral min hek kati namutis koanik,Inau Pol naviten more min kami.

22 Meatin koa envatien onen romultei en Asuv Iesu, sesendaen hel ien. ⁱ

!Asuv orer, amai! !Anatin,maranata!

23 More envatien onen Asuv Iesu hel ven kami.

24 Envatien onak mul en kami vasi koa rokapil vituai ral min Iesu Kristo.